Labels

 

和洋雨樋

Eaves Gutter & Downspout in Japan



一間屋，回到基本，就係天、地、牆。追求安樂，以前啲人好興話：「有瓦遮頭」，反映緊上蓋代表咗房屋，喺人心目中地位。

一個地方房屋形態，受制於當時，有乜嘢係隨手可得、可負擔嘅材料。屋頂瓦片作為一種建築物料，相對乾草、木片等，對古代日本社會，都係較昂貴，多見於寺廟、富貴人家。尋常百姓家，到江戶時代城市內，因為預防火災，才較廣泛應用於民房。

建築固然係一筆成本，日後要去維持一間屋，仲住得人，又係另一仲生活使費。濕水，從來係房屋損耗一大主因，木結構要襟用，早於設計建造時，就要預防日後水份同濕氣積聚，保持空氣通爽，避免長期噏著構件。

瓦片，相對其他天面物料，多好多好處。物料本身不透水，造型簡單，倒模一式一樣，只要工匠將屋頂骨架砌好，一般人受過簡單訓練，就可以舖排瓦頂。屋頂坡度，由陡峭走向平緩，雨水經瓦坑迅速排走，無停留機會，令屋頂發揮防水功能。

不過，即使雨水有效排出屋頂，保養嘅故事仍然未完結。

西方建築，檐頭（簷頭 eaves）往往貼近外牆，雨水容易流落牆身，牆壁受潮，長遠做成另一問題，西方漸以水槽去處理該問題。不過，傳統日本，濕牆問題並非咁迫切，因為日式屋頂支撐構造不同。斗拱呢種做法，係容許業主，可考慮駁長作為屋頂骨幹嘅 椽  ( rafter；桷、榱 [註一]；日文「垂木」)，向外伸延。屋檐飛出外邊，外牆相應褪後咗（set back），沾濕外牆機會減少，甚至容許日本窗戶，糊上半透光和紙，提高室內採光。檐椽 底下呢個間距縱深（奥行き），往往會舖個廊台 (porch) 甚至迴廊 ( 檐廊 veranda 「回縁」 )，內與外之間，做就一份「曖昧」空間，睇日劇，綾瀨遙望後園乘涼嘅地方，日本人稱之為 縁側 （engawa えんがわ），「縁」與「側」，字面都有房屋邊緣、側面意思，就係右邊照片中，「檐椽」底下屋側跟嘅木台。

仲未完。滂沱大雨，雨水由瓦頂傾盆而出，揼落屋四周地面，冲刷屋前後泥土，久而久之，滲番入自己地基，可令地台受潮、木柱基座或地基腐爛、嚴重者泥土流失物業沉降。於是有升高地台、用碎石沿邊砌「雨落」等不同做法，去應對問題。當中，又有人用竹枝，破開一半做接水槽，都會係一個選項。

日本進入明治，時代挑戰，社會急速變化，商業城市發展，更多房屋興建，空間壓縮，房屋之間毗鄰緊接，一間屋天面所收雨水外溢，變成對鄰舍物業或街道上其他人滋擾（nuisance）。另外，西洋建造，包括斜撐屋頂 桁架 （ Truss），以至磚石結構建築，引入日本，與和風合流，之前種種落雨後續問題就放大。

於是乎，西式錫片或波紋鐵片所製成接水槽 ( Gutter , eavestrough 日文 軒樋 )，以及落水管（downspout , downpipe 日文 竪樋 )，日文通稱「樋」，成為有用方法，並隨技術發展，逐漸普及應用，去到今日，必然嘅配件。「樋」做法，係將接水槽釘喺「椽」盡頭，沿屋檐頭，接收瓦片流水，再引落到地面特定地方，排出到市政公共水渠口。

要強調，並非話日本以前無「樋」，現存最古雨樋，見於東大寺法華堂(三月堂)，而江戶時代，城市內房屋，亦都有用竹樋，不過早期照片，因為種種原因，並冇今時今日咁常見，亦放棄以竹、木原材料製造。將「樋」視為一種標準、必備屋宇裝置配件 (standard provision)，應該係較近代嘅事。雨水管成為普遍現象，甚至今日二条城復修臻工，二の丸御殿都會加上「樋」，去適應今日時代建築標準（圖右下）。

[註一]： 桷
《木部》榱：「秦名為屋椽，周謂之榱，齊魯謂之桷。从木衰聲。」《說文》
「桷，榱也，椽方曰桷。」《說文》

Crumbtracker, FB 18/10/2024

延伸閱讀：-


落雨
https://www.facebook.com/crumbtracker/videos/1071547571293293

Roof Tiles (2 of 2) |
Roman & Southern Chinese Patterns
南歐、香港瓦面屋頂排列樣式對比

Rooftop (1 of 2) | 嶺南瓦面屋頂
Hut roof and timber, Chokequan Creek, Foochow, 1880s-1890s


Labels:

Comments

Post a Comment

Popular Posts