< How deep the rabbit hole goes ? >
Queen's Road, Victoria West, 1878
--------
This is your last chance. After this, there is no turning back ... You take the red pill - you stay in Wonderland and I show you how deep the rabbit hole goes.
---------
沿着皇后大道中向西行，越過砵典乍街，經過今日萬宜大廈、麗晶、100QRC。遇上一道門，打開，攬入去。另一邊，係 1878年裙帶路。
自 1840年代，大道中已經係香港最主要幹道，沿大馬路價值最高，所以兩邊，都係密密麻麻房屋。港府以皇后大道為界，將土地分成「海旁」(Marine Lot) 以及「內陸」(Inland Lot) 兩大類別。
左邊山腳為內陸地段，內陸按地形劃成一井一井。眼前左手邊，視界外係閣麟街，之後吉士笠街、嘉咸街、卑利街、鴨巴甸街，通通都係上山嘅路。
右邊海皮為海傍地段，跟內陸唔同，沿海一塊一塊並列。砵典乍街之後公共街道，係由私家巷發展出嚟，大馬路進入呢類街道，首先要穿過排屋或者之間窄巷。呢類街道短而窄，盡頭就係海皮。功能上，佢哋作為街市檔口或地舖購物通道，多過點對點間交通通道。眼前所見，首先係中環街市入口（巷中、巷西），越過「時和」裁縫店，就係英國郵船航運專利「鐵行」，來往英、印、遠東之間乘客，都經此碼頭上岸出入。「鐵行」明顯有經營租務，所屬舖頭，trade mix 集中洋貨店，另有鐘錶修理。之後，有興隆街( Endicott Street ML53)、永安街 / 機利文街( Wing On Street ML54)、機利文新街( Gilman's Bazaar ML55)，明顯就邋雜好多。
大道中兩邊排屋，兩條裙帶，引導大家視線，最終去到一點 vanishing point，就係 "Crossroads"。大馬路、威靈頓街與及文咸街交匯處，一直由5號差館看守著。
1878年，點解？因為要等到「公泰和」，由舊底門牌捌拾玖號，搬到捌拾伍號 (ML18 or ML53)，其招牌，先至得遮住捌拾柒號嘅「合昌押」。
同年12月，冇幾耐之後，中環大火，先由興隆街一間商舖開始。興隆街陷入火海，不過接鄰「鐵行」幸免於難，大火隨風向南飛撲，吹過大馬路，焫着「士得豪爹厘」(Stag Hotel 鹿角酒店) 以東嘅木構建築，火勢一路向山上燒，眼前所見，士他花利街左手邊一列房屋，將會化作灰燼。
有冇諗過，大火之後，重建並非必然。呢度可以係一片爛地，一直荒廢。其實，全世界好多城鎮，唔少係後者。不過，香港從來都係有商業價值嘅地方，好快，浴火重生。所有業主，都喺原有嘅地方重建。
如果放個鏡頭，用快鏡去睇，一棟棟兩層高樓宇燒毁，夷為平地，然之後樓宇原位，又會生長出三、四層高嘅磚構樓宇。而每個新建地盆，長闊面積一模一樣，precisely 不多亦不少。點解會咁？因為大火燒毁嘅，只係放係地契上嘅物件，並無燒毁契約社會。當土地用盡到每一寸，任何人稍有逾越多一寸，都因損害到他人利益而受阻，於是建築物不會出界。一切現象，之所以咁，因為本地有：
☑️ 可執行嘅土地測量
☑️ 清晰完整而持續受保障嘅私有產權
☑️ 土地有價有市並按年上升
☑️ 人口高度集中於CBD
☑️ 契約年期長足
門牌號碼會改變，樓宇風格會改變，地段會切割會組合，商業會變化，工程技術會進步，人口結構會變。但係種種改變，香港會跟隨一個原則，就係業權，而業權歴史，透過註冊登記制度，保存下來。過往香港雖然經歷太平洋戰爭，記錄有所散失，但田土廳仍然有最齊整嘅紀錄。我哋根據地契編號，就可以追溯每個物業、地段故事。天地都在變動，只要掌握地皮業權交易紀錄，只要地契年期夠長，靠著追溯地段，就能夠辨認出，不同年代每一幅地段、每一幢樓宇，它今日所在地位置，並睇透每一個物業前世今生。
所謂年期夠長，眼前維城除咗街市，年期一般 999年，至今最多只不過 182 個年頭，預期契約至少維繫到 2047。
土地資料點樣嚟？私人收藏，各地公私營資料館博物館等等，以文件、年鑑、報章等等形態保存著。不過相比下，田土廳記錄完整得多。值得慶幸，土地註冊記錄，一早已經電子化，並開放予公眾，可付費網上或上門查冊。雖然當中資料會有錯漏決失，但已經好難得。
想像一下，如果將呢批註冊記錄，全面免費開放，供公眾有系統研究，跟其他文件對比，將會發掘更多文本所無資料。揭開一張地圖，逐幅地去查冊，併構出來資料，會係一幅未見過嘅香港歷史地圖。
土地記錄，係香港史一大寶庫，係一份珍貴嘅公共財產。之不過，現時正審議一條新條例草案，去限制公眾人士，去地政署查閱土地業權資料。當條例通過之後，公眾再冇辦法透過查冊，獲得過往能夠得到嘅歷史資料。大門將會關閉。
©️ Crumbtracker, FB 2/8/2025
Comments
Post a Comment